ஒரு கன்னத்தில் அடித்தால் மறு கன்னத்தில் அடி

இடம் : லால்பாக் வெஸ்ட் அருகே உள்ள ஆர்.வி ரோடு.

இந்தச் சாலையில் நான் வழக்கமாக உணவருந்தும் அந்த ரெஸ்டாரெண்ட் அருகே தினமும் காலையில் மீட்டிங் ஆரம்பித்துவிடும். மேனேஜர் ஒருவருக்காக மற்ற எக்ஸிகியுட்டிகள் காத்திருப்பர். மேனேஜர் வந்தவுடன் பரபரப்பாக இயங்கும் அந்தப்பகுதி. வாடகை இல்லை, மின்சாரம் இல்லை . சுற்றி நின்று மீட்டிங் நடைபெறும்.

தினமும் அவர்களது ரிப்போர்ட்கள் அங்கையே பரிமாறப்படும். கிட்டத்தட்ட ஒரு அலுவலகத்தில் நடைபெறும் நிகழ்வுகள் அனைத்தும் அந்த இடத்தில் நடைபெறும். நடமாடும் அலுவலகம் இது.

இன்றும் வழக்கம்போல அந்த நடமாடும் அலுவலகத்தை கவனிக்கின்றபொழுது அவர்களில் மேனேஜர் ஒருவர் ஒரு எக்ஸிகியுட்டியை கன்னத்தில் அடிக்க ஆரம்பிக்கின்றார். அந்த நபரும் தலையை குனிந்தபடியே மௌனமாக இருக்கின்றார்.

எந்த எதிர்தாக்குதலும் இல்லாமல் அவர் அடிக்க அடிக்க மௌனமாக இருக்கின்றார் ஒரு கன்னத்தில் அடித்தால் மறு கன்னத்தைக் காட்டவேண்டியதூன் ஆனால் மறுகன்னத்திலும் அடித்தால்..? திருப்பி கொடுக்க வேண்டியதுதான்..? அவர் திருப்பிக் கொடுத்திருந்தால் அடித்த நபர் கொஞ்சம் நிலை குலைந்திருக்ககூடும். ஆனால் அடிவாங்கிய அவருடைய நிலை என்னவோ தெரியவில்லை..?

அட என்னதான் தவறு செய்தாலும் இப்படியா நடுரோட்டில் வைத்து அடிப்பது.? அடிவாங்கிய அந்த நபருக்கு அவரது வீட்டில் எந்த அளவுக்கு மரியாதை இருக்கும். இங்கு வந்து அடிவாங்கிய விசயம் அவரது வீட்டாருக்குத் தெரிந்தால் எந்த அளவுக்கு வருத்தப்படுவார்கள். வீட்டில் உள்ளவர்களை விடுங்கள் அந்த தனிமனிதனின் உள்ளம் எந்த அளவுக்கு சங்கடப்படும்.

பணத்தேவை மனிதர்களை எப்படியெல்லாம் அட்ஜெஸ்ட் செய்ய வைக்கின்றது பாருங்களேன். அந்த நிகழ்வு மனதை ரொம்பவும் சங்கடப்படுத்திவிட்டது.

-- ரசிகவ் ஞானியார்